សម្តេចមហាបវរធិបតី ហ៊ុន ម៉ាណែត :ក្រសួងធម្មការនិងសាសនា ត្រូវបន្តជំរុញការរៀបចំច្បាប់ស្ដីពីសាសនាឲ្យបានឆាប់តាមដែលអាចធ្វើទៅបាន ដើម្បីធ្វើជាមូលដ្ឋានក្នុងកិច្ចប្រតិបត្តិការងារក្នុងវិស័យសាសនា និងបំពេញបន្ថែមលើលិខិតបទដ្ឋានគតិយុត្ត !!!!!
ដោយះ លោក ហាប់ ប៊ុនហុង
ផ្សាយថ្ងៃ សុក្រ ៥ កើត ខែ កក្តិក ឆ្នាំថោះ បញ្ចស័ក ព.ស. ២៥៦៧ ត្រូវនឹង ថ្ងៃទី ១៧ ខែ វិឆ្ឆិកា ឆ្នាំ២០២៣
(រាជធានីភ្នំពេញ)៖
សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានបន្តអំពាវនាវដល់គណៈសង្ឃទាំងពីរគណៈ និងថ្នាក់ដឹកនាំគ្រប់សាសនានៅក្នុងព្រះរាជាណាចក្រកម្ពុជា បន្តកិច្ចសហការជាមួយក្រសួងធម្មការ និងសាសនា ដើម្បីចូលរួមថែរក្សាសុខដុមរមនាកម្មសាសនា និងលើកកម្ពស់សីលធម៌សង្គមឱ្យបានកាន់តែប្រសើរឡើង។
សម្តេចមហាបវរធិបតី ហ៊ុន ម៉ាណែត បានថ្លែងយ៉ាងដូចនេះនៅព្រឹកថ្ងៃសុក្រ ៥កើត ខែកត្តិក ឆ្នាំថោះ បញ្ចស័ក ព.ស២៥៦៧ ត្រូវនឹងថ្ងៃទី១៧ ខែវិច្ឆិកា ឆ្នាំ២០២៣នេះ នាឱកាសដែលសម្តេច និងលោកជំទាវបណ្ឌិត ពេជ ច័ន្ទមុន្នី ជាឧត្តមភរិយា អញ្ជើញស្រោចស្រពព្រះសុគន្ធវារី ប្រគេនព្រះមន្ត្រីសង្ឃជាន់ខ្ពស់ គណៈមហានិកាយ នៃព្រះរាជាណាចក្រកម្ពុជាចំនួន១១អង្គនៅវត្តមុនីសុវណ្ណ ហៅវត្ត ចំពុះក្អែក ក្នុងសង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ។
សម្តេចមហាបវរធិបតី ហ៊ុន ម៉ាណែត បានថ្លែងដូចនេះថា «សូមគណៈសង្ឃទាំងពីរគណៈនិងថ្នាក់ដឹកនាំគ្រប់សាសនា នៅក្នុងព្រះរាជាណាចក្រកម្ពុជា បន្តកិច្ចសហការជាមួយក្រសួងធម្មការ និងសាសនា ដើម្បីចូលរួមថែរក្សាសុខដុមរមនីយកម្មសាសនា សាមគ្គីភាពនិងវឌ្ឍនភាពសង្គម។ ក្រសួងធម្មនិងសាសនា ត្រូវបន្តសហការជាមួយក្រសួងស្ថាប័នពាក់ព័ន្ធទាំងគ្រប់ភាគីពាក់ព័ន្ធ ដើម្បីជួយលើកកម្ពស់សាសនានិងសីលធម៌សង្គម»។
សម្តេចមហាបវរធិបតី បានបន្ថែមទៀតថា ក្រសួងធម្មការនិងសាសនា ត្រូវបន្តជំរុញការរៀបចំច្បាប់ស្ដីពីសាសនាឲ្យបានឆាប់តាមដែលអាចធ្វើទៅបាន ដើម្បីធ្វើជាមូលដ្ឋានក្នុងកិច្ចប្រតិបត្តិការងារក្នុងវិស័យសាសនា និងបំពេញបន្ថែមលើលិខិតបទដ្ឋានគតិយុត្តនានាក្រោយច្បាប់ ដើម្បីបំពេញតម្រូវការជាក់ស្ដែងរបស់ក្រសួងសម្រាប់លើកកម្ពស់ព្រះពុទ្ធសាសនា ក៏ដូចជាសាសនាផ្សេងៗទៀតទៅកម្ពុជា លើកកម្ពស់សីលធម៍សង្គម សុខដុមនីយកម្មសាសនានៅក្នុងព្រះរាជាណាចក្រកម្ពុជាទាំងមូល។
ជាមួយគ្នានោះដែរសម្តេចមហាបវរធិបតី ហ៊ុន ម៉ាណែត ក៏សូមឱ្យសម្តេចជាអម្ចាស់ សម្តេចព្រះថេរានុត្ថេរៈគ្រប់ព្រះអង្គ ព្រះមេត្តាបន្តផ្ដោតព្រះទ័យជួយជំរុញ និងលើកកម្ពស់ការប្រតិបត្តិធម៍វិន័យឲ្យបានត្រឹមត្រូវតាមពុទ្ធដិកា ដើម្បីជាយានសម្រាប់ចម្លង និងជាស្រែបុណ្យប្រកបដោយសម្មាតិធិ និងជាការសន្សំបុណ្យកុសលសម្រាប់ព្រះសង្ឃរៀងៗព្រះអង្គ និងពុទ្ធបរិស័ទឲ្យមានសុខសន្តិភាព និងការវិវឌ្ឍជានិច្ចនិរន្តន៍។
ក្នុងដំណើរយាងនិងនិមន្តលើមាគ៍ាព្រះធម៍ សម្តេចមហាបវរធិបតី ហ៊ុន ម៉ាណែត ក៏សូមសម្តេចជាអម្ចាស់ សម្ដេចព្រះរាជាគណៈព្រះថេរានុត្ថេរៈគ្រប់ព្រះអង្គ ព្រះមេត្តាបន្តជួយដល់សង្គមជាតិ លើការលើកកម្ពស់គុណធម៌ សីលធម៍ សុជីវធម៌ ថែរក្សាវប្បធម៌អរិយធម៌ប្រពៃណីទំនៀមទម្លាប់ដ៏ថ្លៃថ្លារបស់ជាតិ តាមរយៈការសម្ដែងធម្មទេសនានៅគ្រប់ទីកន្លែង និងការផ្សព្វផ្សាយតាមបណ្ដាញសង្គម ដើម្បីជួយធ្វើឲ្យប្រជាជនកម្ពុជាមាននូវបញ្ញាស្មារតីប្រកបដោយព្រហ្មវិហារធម៍ កាត់បន្ថយអំពើអនាចារ អបាយមុខ អំពើហិង្សា អសីលធម៍ និងចូលរួមជួយឱ្យសង្គមជាតិមានសុខដុមរមនា និងពង្រឹងសាមគ្គីធម៍ផងដែរ៕
ដោយះ គេហទំព័រ បារមីមានរិទ្ទិ លោកយាយយ៉ាត
https://www.bmy-news.com/
